خطط لحياتك

امبارح الأربعاء 2010/12/1
كان موعدنا مع محاضرة محمد شاكر واللى اتكلم معانا فى موضوع مهم جدا جدا وموضوع لازم يكون على رأس اهتمامتنا فى الحياة وعلطول يكون قدامنا واحنا صاحين واحنا ماشين واحنا نايمين حتى نحلم بيه..
الموضوع هو التخطيط للحياة أو تحديد الأهداف

لكن قبل ما نتدخل فى موضوع المحاضرة بدأ شاكر وسألنا كذا سؤال خللى كتير مننا يشوف نفسه صح , طلعنا ورقة وقلم وكتبنا كام سؤال وجاوبنا عليهم ما بين نفسنا..

ايه هى هوياتك... ايه مميزاتك او نقاط القوة اللى فيك...ايه الحاجة اللى لو حصلت معاك تفرحك...وايه الحاجة اللى تزعلك...

كتير مننا يفتكر الماضى ويبكى بجانبه ويقف امامه...ولكن....

الماضى ينقسم حاجتين ..أول حاجة ذكرى سواء حلوة او وحشة ....تانى حاجة خبرة وهى دى اللى تهمنا اللى نستغلها صح للمستقبل ونفيد بيها نفسنا لو مرينا بنفس التجربة مرة تانية

الثقة بالنفس...

اعتداد المرء بنفسه ومعرفته الأكيدة بمهاراته دون إفراط أو تفريط....لأن لو لفيها إفراط هتحول من ثقة إلى غرور وتكبر ولو فيها تفريط هتتحول من ثقة بالنفس الى ذل ومهانة

وبعدين كلمنا شاكر عن تحديات الحياة الثلاثة، وأن الناس منهم من هو :

(1) لا يعرف ماذا يريد

وده الغالب فى معظم الشباب انه معندوش رؤية ..معندوش حلم عايش حياته مش عارف هو جاى منين وهو فين حالا ورايح فين..وده أسهل نوع لأن من السهل انه يغير من قناعاته الشخصية وتغيير أفكاره السلبية ويتعلم ازاي يحط لنفسه هدف

.

(2) يعرف ماذا يريد ولا يعرف ماذا يجب فعله

والنوع ده عارف هو رؤيته ايه وعارف حلمه وعنده هدف لكن مش عارف يتحرك نحو هدفه ازاى ..مش عارف

ادوات التخطيط ايه او يخطط ويرسم لحلمه ازاى.

(3) يعرف ماذا يريد وما يجب فعله ولكن ليس لديه ثقة فى امكانياته.

لماذا لا أخطط؟؟

- منطقة الموت (مقاومة التغيير بحجة انا مرتاح كده ومفيش رغبة للتغيير او المغامرة)

- الخوف المرافق

- عدم الالمام بمهارات التخطيط

- التفاؤل المفرط أو التشاؤم المفرط

الخوف المرافق

من أكتر النقاط اللى عجبتنى انا شخصيا أول مرة اسمع بيها "الخوف المرافق"॥احنا عارفين ايه هو الخوف ..اما المرافق

م/ الخوف من المجهول

انى خايف انتقل لعالم آخر علشان انا جاهل بالعالم ده

وشاكر شبه النقطة دى بالخروج من عنق الزجاجة وكان تفسير جميل اوى للجملة اللى كلنا بنسمعها كتير

اى حد فينا فى العالم بتاعه فى اسفل الزجاجة فلما حد يقول اطلع بره فى عالم تانى من الناجحين وعالم تانى افضل من اللى انت فيه..ونحاول نطلع من الزجاجة لغاية ما نوصل لعنق الزجاجة ونلاقيها ضاقت علينا...نقاوم التغيير ده واننا نطلع بحجة انا كنت فى عالم كبير متسع حاولت اخرج لقيت الدنيا بتضييق عليا فما بالك لو خرجت منها..لا انا هرجع للمتسع احسن واللى اعرفه احسن من اللى معرفوش

ر/الخوف من الرفض

خايف من رفض الناس ليا لو حاولت انى اغير من نفسى للأحسن وانهم ياخدوا موقف منى

أ/الخوف من اتخاذ القرار

بالتغير والوصول لحياة أفضل علشان معنديش اساليب اتخاذ القرار ولا اعرف بمهاراتها

سألوا أحد مديرى احدى الشركات الكبرى عن سر النجاح فقال ..قرارات ناجحة...وانا واحد من الناس اللى نويت بين نفسى آخد كورس عن كيفية اتخاذ القرارات بشكل صحيح..ان شاء الله

ف/الخوف من الفشل

وده أخطر أنواع الخوف...انى خايف اعمل خطة لنفسى علشان هتفشل ومش هحققها ودى راجعة طبعا لثقتى بنفسى وفى امكانياتى وقدراتى

ق/الخوف من قلة الاستعداد

انى مش مستعد كويس انى أغير من نفسى وآخد قرار بوضع خطة لنفسى وأسعى لتحقيقها

جوانب الحياة السبعة

جوانب الحياة السبعة اللى لازم أراعيهم وانا بضع الخطة وأهدافى فى الحياة وحفظناهم مع شاكر بطريقة الرابط الذهنى علشان مش ننساهم ابدا.. وانه يجب مراعاة كل الجوانب وعدم اغفال اى جانب والا لن تكتمل السعادة حتى لو حققت هدفى فى جانب واحد وتركت الباقى..وطلب مننا كل واحد يكتب هدفى فى كل جانب من الجوانب السبعة ناوي يحققهم ان شاء الله من السنة الجديدة 2011 ...

بس قبل ما اعرض الجوانب السبعة احب أعرض الأول مقاييس تحديد الأهداف

فيه مقاييس كتيرة من أشهرها مقياس سمارت أو SMART

SMART

)S( specific ..ليس هدفى توثيق صلتى بالله فقط وانما (حفظ 10 اجزاء من القرآن) ( مثال فقط )

)M( Measureable قابل للقياس ...بعد مرور 6 شهور او السنة كاملة اعرف اقيس هدفى هل حفظت 10 اجزاء ولا كام

)A( Ambitiousطموح ...مينفعش اقول هدفى احفظ صفحة واحدة خلال العام

)R( Realistic واقعى..مينفعش اقول هدفى حفظ 30 جزء خلال العام..ده مش واقعى لشخص لسه بيبدأ حفظ لأول مرة

(T) Timedمحدد بوقت..فى خلال سنة هدفى كذا

اما الجوانب السبعة ..اسمحولى أوضحهم بأهدافى خلال السنة وبالتطبيق على مقياس تحدد الأهداف

الجانب الروحانى

وده أهم جانب اللى هيظبط لينا كل الجوانب التانية ...علاقتى بالله عز وجل...

*هدفى فى خلال سنة هعمل ايه...هقرأ ورد قرآنى يوميا

الجانب الصحى

كتير يضع هدفه الحصول على الملايين ويغفل صحته فتذهب امواله اللى عاش من اجلها على مصاريف العلاج فلا تكتمل سعادته مع انه حقق هدفه....

*الرجوع بعد توقف سنتين الى المواظبة على مبارة كرة القدم كل جمعة

الجانب الشخصى

الجانب الخاص بتنمية المهارات الشخصية...

*حضور كورسات عن اتخاذ القرار والادارة والتسويق الالكتورنى وقراءة كتاب شهريا

الجانب العائلى

وهو الجانب الخاص بأسرتك اللى كتير مننا عايش فى الأوضة بتاعته ومالوش دعوة بالبشر اللى فى البيت

*التقليل من الجلوس امام الفيس بوك والنت واقعد مع اسرتى واخواتى

الجانب الاجتماعى

وهو الخاص بأقاربك وصلة أرحامك وأصحابك وعلاقاتك الاجتماعية المختلفة

*زيارة أسبوعية لأحد الأقراب أو الأصدقاء ومكالمة من الموبايل لأحد الأرقام اللى بقالى شهور مش كلمتها

الجانب المهنى

وهو الخاص بعملى ومستقبلى المهنى

*فريق اى دريم على نهاية 2011 يكون أشهر فريق على مستوى المنصورة ممكن تاخد معاه كورسات تنمية بشرية

الجانب المادى

هدفة فى 2011 انه يكون دخلى كل شهر (....) جنيه

كلمات اخترتها لك

· الجهل بالشئ ليس بعذر

· انت من يضع القواعد ويصنع القيود

· لا تفكر فى الأحلام التى تناسب قدراتك وانما فكر فى القدرات التى تناسب احلامك

· الأهداف كالحياة والهواء الذى تتنفسه

· كل واحد جواه نسر..اكتشف النسر الذى بداخلك

· لا تحول حياتك الى خطة مكتوبة وانما حول خطتك الى حياة

وفى النهاية أشكر مركز اليجانت على حسن ضيافتنا وحسن الاستقبال وكل أعضاء فريق iDream

اللى شرفونا بالحضور...وقبل كده نشكر محمد شاكر اللى شرفنا وامتعنا كعادته وتألقه